G'ayratilla's blog || 🌍🌎🌏 Telegram Channel Link

Gullar sado berib, ko‘z yoshin to‘kar,
Bulbul charx aylabon, xirgoya boshlar.
Hali nazokat bor, Xudoga shukur,
Samolar qo‘lida tutgancha malham,
Zamin o‘z ohangin sayr etur beg‘am.
Yerning burqsib yotgan joyida ham
Hali latofat bor, Xudoga shukur.

Bir go‘dak adashib qolsa gar o‘ynab,
Zotlar bor eltar uyiga avaylab.
Odamlar judayam ketmagan aynib,
Hali omonat bor, Xudoga shukur.

Sezaman, har banda qolganda tanho,
Samoga ko‘klanar unsiz iltijo.
Og‘riq ham ko‘ngilda yig‘laydi goho,
Hali diyonat bor, Xudoga shukur.

Hali tugamagan ilohiy ko‘rik,
Hali mo‘jizalar qalb bilan sherik.
Suvni tez oqizgan valiylar tirik,
Hali karomat bor, Xudoga shukur.

Hamon oramizda yurar xor iblis,
Sherik tutmoq uchun ming tayyor iblis.
Shukur, tosh otmoqqa imkon bor iblis,
Hali arofat bor, Xudoga shukur.

Dillar bor intilar dillikka o‘xshashga,
Ko‘kdagi yor uchun jonin to‘shashga.
Mash’ar zoti hali haqli yashashga,
Hali sadoqat bor, Xudoga shukur.

Ixlos jajji dilda bo‘lsa salomat,
Hech kimdan aylamas inson malomat.
Qopmoqqa shoshilma buncha Qiyomat,
Hali muhabbat bor, Xudoga shukur.

#XayrullaXamidov

#OneDay

Ba’zan yurak seni allaqachon unutgan deb o‘ylagan insoning tomon yana tortadi.
Oradan qancha vaqt o‘tgan bo‘lmasin, bir qarash, bir ism yoki tasodifiy bir xotira kifoya — ichingda allaqachon so‘ngan deb o‘ylagan tuyg‘ular yana uyg‘onadi.
Shunda o‘zingdan so‘raysan:
Bu yana sevgimi?..
Yoki yurak shunchaki eski kunlarni sog‘inyaptimi?
Axir inson ba’zan odamni emas,
u bilan birga his qilgan o‘zini sog‘inar ekan.
Balki biz qaytishni emas,
o‘sha paytdagi beg‘ubor sevgimizni qaytarishni xohlayotgandirmiz.
Balki yurak hali ham o‘sha insonni tanir,
aql esa uning endi avvalgidek emasligini biladi.
Eng og‘iri —
hislar qaytadi,
lekin odamlar o‘zgargan bo‘ladi.
Shunda bilolmaysan:
yana bir bor sevib qolyapsanmi,
yoki shunchaki yuraging
Chin sevgining eshigini taqillatib ko‘ryaptimi?.. ❤️‍🔥